Na die renoster saga van vroeër, is aandete voorberei en die familie het gesmul, opgewas, gestort en bed toe gemik. Ramón na die reuse se besoek, was skrikkerig om in die tent te slaap, kry toe my slaapplek in die karavaan en ek gaan op sy plek in die laphuis lê. Middernag word ek wakker met die klank van tuindienste se bossieslaners net langs die tent. Tot my verbasing was ‘n trop renosters een meter van my af aan die wy, sommer teenaan die tent. Dit het soos “weed-eaters” geklink. Ek staan toe maar op en maak my “midnight” koffie! Oudergewoonte maak ek ook my dogter wakker en ons drink saam koffie. Kyk sterre en soek sateliete. Praat oor lewens-sake. Die natuur begin roep en ek probeer haar daaruit praat. Tien renosters tussen ons en die geriewe. Glad nie ‘n opsie nie. Maar as die nood druk dan moet dit gedoen word. Ek rig Mariska toe af om deurentyd te sorg dat daar ‘n dik boom tussen haar en die naaste renoster is. En daar gaan ons. Soontoe en terug. Veilig terug in die tent, maak ons nog ‘n koffietjie en die geselskap droog op en die sandjies krap weer in ons oë. Ons groet en gaan kruip maar weer in.
Die volgende oggend hoor ons by ‘n kamper buurman van twee mal mense met kopliggies aan wat tussen die trop renosters deur na die ablsusieblok toe is om en by middernag. Heeltemal waansinnig reken die man, hoort behandeling te kry meen hy!
Ons het want ons kan! En ons moes!
Boendoetrekker Groete
Isak de Lange
No comments:
Post a Comment